जनकपुर टुडे

२०८२ जेष्ठ १७, शनिबार १९:०९

आम जनता पार्टीका अध्यक्ष प्रभु साहले जनकपुरधाममा आयोजित ‘वर्तमान व्यवस्था: दलतन्त्र हो कि गणतन्त्र’ विषयक अन्तरक्रिया कार्यक्रममा वर्तमान राजनीतिक व्यवस्था जनताका लागि घातक भएको बताएका छन्। उनले भने, “एक राजा फालेर अनेकन राजा आएका छन्, जसले जनतालाई पीडित बनाएका छन्।”

साहले तीन विकल्प प्रस्तुत गर्दै भने, “पहिलो, शाही राजतन्त्र पुनःस्थापना; दोस्रो, वर्तमान दलतन्त्र स्वीकार्ने; र तेस्रो, जनतालाई राजा बनाउने।” उनले तेस्रो विकल्पलाई समर्थन गर्दै मधेशका जनतालाई प्राकृतिक स्रोतहरूमा अधिकार नदिइएको आरोप लगाए।

उनले सिंहदरबारका वर्तमान शासकहरूलाई चेतावनी दिँदै भने, “नारायणहिटी जस्तै सिंहदरबार पनि छोड्नुपर्ने अवस्था आउन सक्छ।” साहले एमाले अध्यक्ष केपी ओलीसँगको राजनीतिक प्रतिस्पर्धामा आफू विजयी भएको उल्लेख गर्दै जनताले विश्वास गर्ने नेतृत्व आवश्यक रहेको बताए।

कार्यक्रममा पार्टीका धनुषा र मधेशका विभिन्न जिल्लाका नेता तथा कार्यकर्ताहरूको उपस्थिति थियो।